Treviso, te vogio ben! Una poesia di Paola Scorzon

TREVISO, TE VOGIO BEN!
Paola Scorzon

Quando che go lassà Venessia,
pianzendo tute le me’ lacrime
pensava: “Xe finìa la parte megio
de la me’ vita!”. Come desmentegar
el rumor de l’aqua che bate chieta,
de note, su le rive, l’odor de l’erba
marcìa dei canali, el tubar dei colombi
su le gronde, el sigo stranìo dei cocai!
Dove trovar i campieli co’ la zente
che, a mezanote, la se ferma a parlar
sentada sui scalini dei pozi,
façendo ciacole che le te svegia,
ma no’ te ne importa gnente,
parché no’ te te senti più sola,
mentre la luna, lassù da l’altana del çielo
la varda e scolta indiscreta,
e la note tàrdega a passar,
parché do’ inamorai se possa ancora basar!
So’ rivada a Treviso e me go vardà in giro.
Ghe gera anca qua colombi e cocai:
i campi se ciamava “piaze”, “fiumi” i canali,
e, in un canton, ghe gera sempre do’ inamorai!
No’ ghe trovavo po’ tanta diferenza,
se no’ fusse sta pai semafori e le moto,
che, squasi, squasi, le tirava soto!
Un fiatin a la volta me so’ abituada
a vìvar in mezo a tanta brava zente.
Na matina go verto el balcon.
El sol me vardava ridendo:
me se ga slargà el cuor e go sigà:
“Treviso, te vogio ben, ciapa un gran strucon!”


foto di Elena Carrer

Ti è piaciuto? Condividi subito!